Proxecto de atención integral a mulleres con problemas de violencia de xénero.
Código proposta de investimento: 2509
Desde a Asociación Veciñal "AGRA", segundo o acordo adoptado por unanimidade na Asemblea Xeral celebrada o pasado día 9 de xuño, fago esta proposta que concreto en:
- Centros de acollida rehabilitando vivendas nos diferentes barrios da cidade.
- Programa de rehabilitación e integración social das vítimas.
- Programa de asistencia xurídica e emocional.
- programa de axuda económica previa á integración laboral necesaria.
Proposta en nome de: Asociación Veciñal "AGRA"
Informe de inviabilidade
Esta proposta foi considerada INVIABLE segundo o seguinte informe técnico: "A entidade propoñente sinala catro propostas no marco da proposta xeral, e delas, tan só a primeira constitúe un custo de investimento (centros de acollida/pisos rehabilitados, por exemplo). O resto das propostas (rehabilitación e integración social, asistencia xurídica e emocional e axudas económicas previas á integración laboral), son gastos correntes e non de investimento. Aínda así, é necesario comentar que o Concello da Coruña conta xa cunha Rede municipal de acollemento a vítimas de violencia de xénero e desenvolve, a través do Centro de Información ás Mulleres, actuacións dirixidas a mulleres e menores en situación de especial vulnerabilidade. En canto á rehabilitación de pisos a modo de centros de acollida, o Concello xa conta na actualidade cunha Casa de Acollida e con dous pisos para a transición á vida autónoma para mulleres vítimas. En calquera caso, a proposta de investimento supera o millón de euros, que é o límite deste programa de Orzamentos Participativos." Agradecemos a túa contribución a este programa e esperamos contar de novo coa túa participación na edición do ano que vén.
Apoio a proposta porque é necesaria a creación deste centro de acollida e atención integral a mulleres víctimas de violencia machista e dunha enorme repercusión en toda a sociedade.